Ota nasihati.

"Dunyoga endi sal jiddiyroq qara.

Davlat topmasang ham, iymonni saqla!

Dunyo deb, bolam deb qalbi ming yara."

Otam aytdi: "O'g'lim onangni asra!"

"Istagan istaging qo'lingga tutgan,

Salgina kechiksang jon halak kutgan,

Hayoti garovda sizlarni  tuqqan."

Otam aytdi: "O'g'lim onangni asra!"

"Qo'llaringdan tutib yurgizgan shudir.

Turmasding, oyoqqa turgizgan shudir.

Ko'rmagan dunyongni ko'rgizgan shudir."

Otam aytdi: "O'g'lim onangni asra!"

"Chiqardi ta'liming tarbiyang, savod.

Ulg'aytirdi bo'l deb komil bir avlod.

Ming bor takrorlayman aytaman bod-bod."

Otam aytdi: "O'g'lim onangni asra!"

"Kunlaring nurafshon aylagan oftob.

Tunlaring charog'on aylagan mohitob.

Arziydi bir umr aylasang tavof."

Otam aytdi: "O'g'lim onangni asra!"

"Yelib yuguradi kim deb? Sen uchun.

Uchib ulguradi kim deb? Sen uchun.

Jonin kuydiradi kim deb? Sen uchun."

Otam aytdi: "O'g'lim onangni asra!"

"Baxtingni o'ylagan mehriboning shu.

Tarbiyang avvali nigohboning shu.

Qadrla eng arzir qadrdoning shu."

Otam aytdi: "O'g'lim onangni asra!"

"Onadir dunyoda eng ulug' ayol.

Mayli mendan xatto so'rama ahvol."

O'zi to'shakda-yu, o'zi xastahol.

Otam aytdi: "O'g'lim onangni asra!"

                                         Akbar Shoh.